Qızının başını kəsən ataya 14 il həbs cəzası verildi
07 iyun 2010 13:45 (UTC +04:00)

Qızının başını kəsən ataya 14 il həbs cəzası verildi

İyunun 7-də Ağır Cinayətlərə dair İşlər üzrə Məhkəmədə öz qızını öldürməkdə təqsirləndirilən Dəvəçi rayon sakininin cinayət işi üzrə məhkəmə prosesi başa çatıb.


Lent.az-ın məlumatına görə, hakim Əmir Bayramovun sədrliyi ilə keçirilən prosesdə təqsirləndirilən Qurban Sərdarova hökm oxunub. Hökmə əsasən, Q. Sərdarov 14 il müddətinə azadlıqdan məhrum edilib.


İttihama görə, bu ilin fevralın 17-də Dəvəçi rayonu H. Əliyev küçəsində yaşayan, 1962-ci il təvəllüdlü Quraban Məhərrəm oğlu Sərdarov 1986-cı il təvəllüdlü qızı Pərvin Sərdarovanın boğazını kəsərək qətlə yetirib. Qətli törədəndən sonra Q.Sərdarov rayon prokurorluğuna gedərək hadisə barədə məlumat verib.


O, ibtidai istintaqa və məhkəməyə ifadəsində qızını yüngül həyat tərzi keçirdiyinə görə qətlə yetirdiyini söyləyib.



Q.Sərdarov Azərbaycan Respublikası Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham olunub.


Fərid Əkbərov
# 244

Oxşar yazılar