Zakir Qaralov Çexiya şirkətini məhkəmədə uddu

“Kojeni işi” ilə bağlı Bakıda məhkəmə prosesi keçirilib

Bakı Apelyasiya Məhkəməsində Çexiyanın “Harvard Sənaye Holdinqi” Səhmdar Cəmiyyətinin Azərbaycanın baş prokuroru Zakir Qaralova qarşı iddia üzrə apelyasiya şikayətinə baxılıb.

Məhkəmədən Lent.az-a verilən məlumatına görə, hakim İlqar Dadaşovun sədrliyi ilə keçirilən prosesdə birinci instansiya məhkəməsinin çıxardığı qərar qüvvədə saxlanılıb.

Səbail rayon məhkəməsinin 18 fevral 2010-cu il tarixli qərarı ilə məhkəmə Çexiya şirkətinin müraciətini qəbul etməyib, Z.Qaralovun xeyrinə qərar çıxarıb.

Qeyd edək ki, Səhmdar Cəmiyyət bir müddət əvvəl Zakir Qaralova müraciət edib. Ancaq baş prokuror müraciətlərə cavab verməyib. Şirkət baş prokurorun hərəkətsizliyi barədə iddia qaldırıb. Məhkəmə isə iddianı rədd edib.

“Harvard Sənaye Holdinq” Səhmdar Cəmiyyəti baş prokurora ünvanladığı müraciətdə cəmiyyətin keçmiş prezidenti Viktor Kojenni, onun şəriki Boris Vostri və digərlərinin törətdikləri əməllərin düzgün araşdırılması xahiş edilib.

Fərid Əkbərov