Yevlaxda silahlı insident, 1 ölü

Qətlin törədilməsinə iki gənc arasında uzun illər davam edən şəxsi ədavət səbəb olub

Azərbaycanın Yevlax rayonunda qətl hadisəsi baş verib. Bu barədə APA-ya Yevlax rayon Polis Şöbəsindən məlumat verilib.

Hadisə iyunun 1-də rayonun Səmədabad kəndində qeydə alınıb. Kənd sakini, 1980-ci il təvəllüdlü Hafiz Yaşar oğlu Hüseynov ov tüfəngindən atəş açaraq İsmayılabad kənd sakini, 1980-ci il təvəllüdlü Seymur Kamal oğlu Məmmədovu qətlə yetirib.

İlkin araşdırmalara görə, hadisənin baş verməsinə iki gənc arasında uzun illərdən bəri davam edən şəxsi ədavət səbəb olub. Polis əməkdaşlarının həyata keçirdiyi əməliyyat-axtarış tədbirləri nəticəsində H. Hüseynov saxlanılıb.

Faktla bağlı Yevlax rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, istintaq tədbirləri davam etdirilir.