İsrail hərbçilərinin həbs etdiyi şəxslər arasında azərbaycanlılar da var

Fələstinin Qəzza zolağına 6 gəmidən ibarət “Azadlıq donanması” ilə humanitar yardım aparan və mayın 31-nə keçən gecə İsrail hərbçilərinin keçirdiyi əməliyyat nəticəsində həbs olunan şəxslər arasında Azərbaycan vətəndaşları da var.

APA-nın məlumatına görə, beynəlxalq xəbər agentlikləri saxlanılan 682 xarici ölkə vətəndaşından 2-si Azərbaycan vətəndaşıdır. Saxlanılanların 45-i könüllü deportasiyanı qəbul edib və iyunun 1-də ölkələrinə göndərilib. Digər şəxslər də 48 saat içində öz ölkələrinə yola salınacaqlar. Bu barədə qərar İsrailin hərbi-siyasi rəhbərliyinin birgə iclasında qəbul olunub.

Xatırladaq ki, İsrail tərəfindən dənizdən blokadaya alınmış Qəzzaya humanitar yardım aparan 6 gəmidə 40 ölkənin fəalları olub. İsrail Hərbi Dəniz Qüvvələrinin beynəlxalq sularda keçirdiyi hərbi əməliyyat nəticəsində 9 nəfər öldürülüb, onlarla adam yaralanıb. Ölənlərdən 4-ü Türkiyə vətəndaşıdır.