Vurulan gəmidə qalmış türklərin taleyi bilindi

İsrailin hücum etdiyi “Mavi Marmara” gəmisində olan türklər vətənə qayıdırlar.

Lent.a-ın “Vatan” qəzetinə istinadən verdiyi məlumata görə, 3 türk dünən axşam saatlarında Türkiyəyə gəliblər.

Bu türklərdən Bayram Kaya deyib ki, Qəzza sektoruna humanitar yardım aparan gəmiyə vertolyotlardan enən İsrail əsgərləri dərhal atəş açmağa başlayıblar və elə ilk atəş zamanı onlarla insan ölüb və yaralanıb.

Bu arada məlum olub ki, İsrail hərbçilərinin “Aşdod” limanına gətirdikləri gəmidəki 30-a yaxın türk də artıq “Ben Gurion” aeroportuna aparılıb və yaxın saatlarda təyyarə ilə Türkiyəyə göndəriləcəklər. “Aşdod” limanındakı mərkəzdə İsrail rəsmilərinin tələblərini qəbul etməyən 18 türk isə ölkənin cənubundakı Ber Şeva qəsəbəsindəki həbsxanada saxlanılır. İsrail xəstəxanalarında isə 19 yaralı türk var.