Yevlax-Balakən yolu açıldı

30 may 2010-cu il tarixində yağan leysan xarakterli yağışlar Qapıçay çayında suyun səviyyəsinin artmasına səbəb olub.

Lent.az-ın Fövqəladə Hallar Nazirliyinin rəsmi saytına istinadən verdiyi məlumata görə, Qax rayonunun Marsan kəndinin ərazisini sel suları basıb. Bakı-Balakən avtomobil yolunun və Yevlax-Balakən dəmiryolu xəttinin Marsan kəndindən keçən hissəsini, eləcə də 125 fərdi evin zirzəmisini və həyətyanı sahələri su basıb, bəzi həyətlərin hasarları aşmış, 2 baş iri və 15 baş xırdabuynuzlu ev heyvanı, 300-dən artıq ev quşu və 70-dən çox arı pətəyini sel aparıb.

Hadisə yerinə cəlb edilmiş Fövqəladə Hallar Nazirliyinin Dövlət Yanğından Mühafizə Xidmətinin əməkdaşları həmin ərazilərin sel sularından təmizlənməsini, müvafiq təhlükəsizlik tədbirlərinin görülməsini təmin ediblər. Hazırda avtomobil yolunda və dəmiryolu xəttində nəqliyyatın hərəkəti bərpa olunub.