Bakıdan Moskvaya əntiq sikkə aparmaq istəyən şəxs tutulub

Rus imperatoru II Aleksandrın profili əks olunmuş 1 ədəd sarı metal hava limanında aşkar edilib

Heydər Əliyev adına Beynəlxalq Hava Limanının gözləmə zalında Bakı-Moskva aviareysinin sərnişini, Azərbaycan Respublikası vətəndaşı Arif Məlikov Hava Nəqliyyatında Baş Gömrük İdarəsinin əməkdaşları tərəfindən saxlanılıb. Lent.az-ın Gömrük Komitəsinin rəsmi saytına istinadən verdiyi məlumata görə, Arif Məlikovun üzərində gömrük qanunvericiliyinə uyğun olaraq şəxsi yoxlama keçirilib.

Sərnişinin üzərindən gömrük sərhədindən bəyan etməməklə keçirmək istədiyi - ön tərəfində rus imperatoru II Aleksandrın profili əks olunmuş 1 ədəd sarı metaldan hazırlanmış predmet aşkar edilib. Həmin əşya dəyəri və tarixi əhəmiyyətinin müəyyənləşdirilməsi üçün Azərbaycan Dövlət İncəsənət Muzeyinə təqdim olunub, ekspert rəyinə əsasən, tarixi əhəmiyyət kəsb etdiyi təsdiqlənib.