Gəncədə narkobanda ələ keçdi

Daxili İşlər Nazirliyinin Baş Narkotiklərlə Mübarizə İdarəsinin Qərb Regional şöbəsinin əməkdaşları narkotik maddələrin qanunsuz dövriyyəsi ilə məşğul olan cinayətkar dəstəni həbs edib. Hüquq mühafizə orqanı əməkdaşlarının Gəncə və Goranboyda həyata keçirdiyi əməliyyat tədbirləri nəticəsində 4 nəfər saxlanılıb. Saxlanılanlardan biri qadındır.

Bu barədə Lent.az-ın Gəncəbasar müxbirinə Baş Narkotiklərlə Mübarizə İdarəsinin Qərb Regional şöbəsinin rəis müavini Rafael İsmayılov məlumat verib. Onun bildirdiyinə görə, hüquq mühafizə orqanı əməkdaşlarına bu qrupun mütəmadi olaraq Bakı və Naftalan şəhərlərindən narkotik vasitələrin satışı ilə məşğul olduğu barədə məlumat daxil olub. Aparılan axtarış tədbirləri nəticəsində Gəncə şəhər sakinləri 1964-cü il təvəllüdlü Aslanov Rüfət Heydər oğlu və “Mehriban” ləqəbli Kazımova Bəsti İsrayıl qızı, Goranboy rayon Xanqərvənd kənd sakinləri Aslanov Rəşad Tahir oğlu və Adıgözəlov Fəxri Sərhad oğlu iş başında, yəni 200 qram narkotik vasitə olan heroini satmaq istəyərkən tutulub. Dəstə üzvlərinin üzərindən istifadə etdikləri iynələr və mobil telefonlar da götürülüb.

Faktla bağlı Azərbaycan Respublikasının Cinayət Məcəlləsinin 234-cü və 234.4.3-cü maddələri ilə iş açılıb, araşdırma aparılır.

Vüsalə Cənnətova