Fəlakət zonasında 33 nəfər xilas edildi

Köçürülməkdən imtina edən şəxslər təhlükə ilə üzləşiblər

Sarısu gölünün şərq sahilində bir neçə istiqamətdə bəndin yuyulması nəticəsində təhlükəli vəziyyətə düşmüş Sabirabad rayonunun Qasımbəyli, Muradbəyli, Əsgərbəyli, Axtaçı kəndlərinin, Saatlı rayonunun Novruzlu, Dəllər, Nərimankənd, Musalı kəndlərinin və yaxınlıqdakı məcburi köçkün şəhərciyinin əhalisi təxliyə edilib.

Lent.az-ın verdiyi məlumata görə, Fövqəladə Hallar Nazirliyinin yaydığı son məlumatda bildirilir ki, mayın 24-dən 25-ə keçən gecə ərzində qeyd edilən kəndlərdə suyun səviyyəsinin artması səbəbindən təxliyədən imtina etmiş şəxslər təhlükə ilə üzləşib.

Gecə və səhər saatlarında Fövqəladə Hallar Nazirliyinin Dövlət Sularda Xilasetmə Xidmətinin qayıqları və Nazirliyin Aviasiya dəstəsinin vertolyotları vasitəsilə, ümumilikdə, 33 nəfər xilas edilib. Hazırda hadisə yerində xilasetmə işləri, həmçinin, dağılmış bəndin bərpası istiqamətində müvafiq işlər davam etdirilir.