Qəhrəmanlar Unudulmur – Milli Qəhrəmanlar Ənvər Arazov və Yusif Əliyev

Qarabağ Azadlıq Təşkilatı və Milli Qəhrəmanları Tanıtma İctimai Birliyi Azərbaycanın ərazi bütövlüyü uğrunda vuruşmuş Milli Qəhrəmanların cəmiyyətə bir daha təqdim olunması üçün təşəbbüs irəli sürüb.

Lent.az da bu təşəbbüsə qoşulur və Milli Qəhrəmanların doğum günlərində onlar haqqında məlumatları dərc edir.

Qəhrəmanlar Unudulmur!

2 dekabr Milli Qəhrəmanlar Ənvər Arazov və Yusif Əliyevin doğum günüdür.

Ənvər Talış oğlu Arazov 1953-cü il dekabrın 2-də Gəncə şəhərində anadan olub. O, cəbhənin Goranboy, Ağdərə, Ağdam və digər istiqamətlərində polis (milis) zabiti kimi şücaətlə döyüşüb, onun başçılıq etdiyi dəstə bir sıra uğurlu əməliyyat həyata keçirib, 1992-ci il noyabrın 1-dən 2-nə keçən gecə Dağlıq Qarabağın Sırxavənd kəndi uğrunda gedən döyüşdə qəhrəmanlıqla həlak olub. 1992-ci il noyabrın 6-da Milli Qəhrəman adına layiq görülüb.
Gəncə şəhərində Şəhidlər Xiyabanında dəfn edilib.

Yusif Əliyusif oğlu Əliyev 1963-cü il dekabrın 2-də Bakının Qobustan qəsəbəsində anadan olub. O, 1990-cı ilin avqustundan polis (milis) nəfəri kimi cəbhəyə yola düşüb, Goranboy rayonunun kəndlərinin müdafiəsində fəal iştirak edib, 1991-ci il sentyabrın 14-də Buzluq kəndi uğrunda döyüşdə qəhrəmanlıqla həlak olub. 1992-ci il iyunun 6-da Milli Qəhrəman adına layiq görülüb.
Ağsu rayonu Rəhimli kəndində dəfn edilib. Qobustan qəsəbəsindəki 195 saylı orta məktəb onun adını daşıyır, məktəbdə büstü qoyulub.