“Sınıq Körpü”-də qaçaqmalçılığa cəhd

Sərnişin avtobusunda gömrük nəzarətindən gizlədilən mobil telefon və aksesuarları aşkarlandı Tovuz Gömrük İdarəsinin “Sınıq Körpü” gömrük postunda Gürcüstan Respublikasından Azərbaycan Respublikasına gələn Gürcüstan vətəndaşı Maqamedali Nəsibovun idarə etdiyi “Mercedes Benz Sprinter 416 CDİ” markalı sərnişin mikroavtobusu gömrük nəzarətindən keçib. Lent.az-ın Dövlət Gömrük Komitəsinin rəsmi saytına istinadən verdiyi məlumata görə, gömrük nəzarəti zamanı həmin avtobusun salonunda, gömrük nəzarətindən gizlədilmiş şəkildə “Nokia” və “Samsung” markalı cəmi 95 ədəd mobil telefon (müxtəlif modelli) və müxtəlif mobil telefonlara aid aksesuarlar - 95 ədəd karton qutu, 92 ədəd akkumulyator, 92 ədəd qidalandırma cihazı və 63 ədəd “qulaqcıq”aşkar edilərək saxlanılıb.