Qazaxda yanacaqdoldurma məntəqəsinə silahlı basqın

Lent.az-ın Daxili İşlər Nazirliyinin mətbuat xidmətinə istinadən verdiyi məlumata görə, Yuxarı Salahlı kəndi ərazisində fəaliyyət göstərən "Fərid" yanacaqdoldurma məntəqəsinə gələn maskalı 2 naməlum şəxs orada işləyən Cavanşir Bayramovu tapança və avtomat silahla hədələyərək əl-qolunu yapışqanlı kağızla bağlayıb. Quldurlar yanacaqdoldurma məntəqəsindən 4000 manat pul aparıblar.

Qazax Rayon Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törədən Gürcüstan vətəndaşı Nodar Qaruçava tutulub. Hadisənin digər iştirakçılarının Anquli Apşilava və Aleksandre Apşilava olduğu müəyyən edilib. Nodar Qaruçavanın idarə etdiyi "Man" markalı avtomaşına baxış zamanı hadisə törədilərkən istifadə olunmuş 1 ədəd "AK" silahı, 1 ədəd "Revolver" markalı tapança, 1 ədəd süngü-bıçaq, 1 ədəd patron darağı, 30 ədəd avtomat və 6 ədəd tapança patronu aşkar edilərək götürülüb.