Baş Prokurorluq Rafiq Tağının zəhərli iynəilə öldürülməsi iddiasına münasibət bildirdi

Baş Prokurorluğun mətbuat xidmətinin rəhbəri Eldar Sultanov vəkil Elçin Sadıqovun Rafiq Tağının zəhərli iynə vasitəsilə öldürülməsi barədə açıqlamasına münasibət bildirib. Eldar Sultanov Lent.az-a bildirib ki, zərəçəkmiş şəxsin nümayəndəsi Elçin Sadıqov tərəfindən yayılan həmin məlumatlar cinayət işinin materialları ilə ziddiyyət təşkil edir.

O qeyd edib ki, Elçin Sadıqov tərəfindən bununla bağlı istintaqa hər hansı bir vəsatət təqdim edilməyib: “Lakin bununla belə, Rafiq Tağıyevin hüquqi varisi M.Tağıyeva və sonuncunun nümayəndəsi Elçin Sadıqov tərəfindən istintaqa daxil olmuş həyata keçirilməsi xahiş olunan ayrı-ayrı istintaq və prosessual hərəkətlərə dair vəsatətlərə cinayət-prosessual qanunvericiliyin tələblərinə əsasən baxılaraq müvafiq qərarlar qəbul edilib”.

Eldar Sultanov Rafiq Tağının qətlinin üstünün açılması ilə bağlı istintaqın dayandırılması ilə bağlı xəbərlərin həqiqəti əks etdirmədiyini də söyləyi. Onun sözlərinə görə, Baş Prokurorluğun Ağır cinayətlərə dair işlər üzrə istintaq idarəsində qeyd edilən cinayət işi üzrə yaradılmış istintaq-əməliyyat qrupu tərəfindən cinayəti törətmiş şəxsin və ya şəxslərin müəyyən edilərək məsuliyyətə cəlb olunması istiqamətində müxtəlif fərziyyələr ətrafında zəruri istintaq-əməliyyat tədbirləri davam etdirilir: “İstintaqın dayandırılması barədə yayılan informasiyalar həqiqəti əks etdirmir”.