Bakının ortasında qadını maşına salıb zorlamaq istədilər – TƏFƏRRÜAT

Oktyabrın 30-na keçən gecə Bakı şəhər Yasamal rayon Polis İdarəsinə təcavüzə məruz qaldığını iddia edən qadın müraciət edib. Polis idarəsindən Lent.az-a verilən məlumata görə, Qaryağdıoğlu küçəsində yaşayan 1971-ci il təvəllüdlü Ə.Ş. bildirib ki, tanımadığı şəxs ona hücum edib və zorlamaq istəyib.

41 yaşlı qadına yaşadığı evin yaxınlığında xarici markalı avtomobil yaxınlaşıb. Avtomobilin sürücüsü qadından maşına oturmasını tələb edib: “O, qapını açaraq maşına minməyimi tələb etdi. Dedi ki, polis zabitidir, ona burda heç kim heç nə edə bilməz”.

Qadının bildirdiyinə görə, həmin şəxs onunla cinsi münasibətdə olmaq istədiyini bildirib. Ə.Ş. isə razılaşmayıb. Bunu görən sürücü maşını qadının yanına sürüb və onu maşına salaraq, zorlamağa cəhd göstərib. Lakin 41 yaşlı qadın onun əlindən çıxaraq qaça bilib. Şikayətçi bildirib ki, qışqırıb və təcavüzçü ətrafdakı insanları görəndən sonra fikrindən müəyyən qədər daşınıb.

Hazırda qadının şikayət ərizəsi üzrə polis araşdırmalar aparır.

Nizam RZA