“Vəziyyətin kökündə məhz Ermənistanın işğalçılıq siyasəti dayanır” - Nazir

“Dağlıq Qarabağ münaqişəsinin həlli ilə bağlı qəbul olunan qərar və qətnamələr həyata keçirilmir, ikili standartlar müşahidə edilir”.

XİN-dən APA-ya verilən məlumata görə, bunu Xarici İşlər naziri Ceyhun Bayramov Macarıstan Xarici İşlər və Ticarət naziri Peter Siyarto ilə görüş zamanı deyib.

C. Bayramov bölgədə olan vəziyyət, xüsusilə Ermənistanın son təxribatı, bölgədə gərginləşən vəziyyətin kökündə məhz Ermənistanın işğalçılıq siyasətinin dayandığı, 30 ilə yaxındır ki, Azərbaycan ərazilərinin Ermənistanın hərbi işğal altında saxlandığı və məhz bu səbəbdən də bölgədə gərginliyin müşahidə olunduğu barədə qarşı tərəfi məlumatlandırıb.

Ermənistanın iki dövlət sərhədində son hərbi təxribatı və bölgədəki mövcud vəziyyətlə bağlı qarşı tərəfi ətraflı məlumatlandıran C. Bayramov bölgədə davamlı sülh və təhlükəsizliyin, rifahın təmin olunmasında yeganə yolun məhz BMT Təhlükəsizlik Şurasının qətnamələri və digər təşkilatların məlum qərar və sənədlərinin də tələb etdiyi kimi işğalçı ölkənin silahlı qüvvələrinin Azərbaycanın işğal olunmuş Dağlıq Qarabağ bölgəsindən və yeddi ətraf rayonundan çıxarılmasının olduğunu qarşı tərəfin diqqətinə çatdırıb.