Əsəd Qərbi hədələdi: “Biz qalib gələcəyik”

Suriya prezidenti Bəşər Əsəd Qərbi hədələyib.

Lent.az-ın “Əl-Əhbar” qəzetinə istinadən verdiyi məlumata görə, Qərbin Suriyaya hərbi müdaxiləsi ilə bağlı ordu rəhbərliyi ilə keçirdiyi görüşdə Bəşər Əsəd deyib ki, Suriya və Qərb qarşıdurması tarixə keçəcək və Suriya xalqı qalib gələcək.

Bəşər Əsəd bildirib ki, böhranın başlanğıcından əsl düşmənin ölkəyə müdaxiləsi anını gözləyiblər: “Mən əminəm ki, siz hərbçilərin yüksək mənəvi ruhu var, Vətəni qorumağa hazırsınız. Bu, tarixi qarşıdurma olacaq və biz qalib gələcəyik”.

Hava zərbəsindən müdafiəyə hazırlaşan Suriya ordusunun bölmələri də artıq daimi dislokasiya məkanlarını tərk edib, Dəməşq Beynəlxalq Aeroportu və paytaxt ətrafındakı bazalardakı hərbi birliklər çıxarılıb. “Guardian” qəzeti Suriya Hərbi Hava Qüvvələrinin ABŞ və müttəfiqlərinin mümkün hücumunun qarşısını almaq üçün pilot-kammikadze qrupundan istifadə etməyə hazırlaşdığını yazıb. Bu qrupa 13 pilot daxildir. Ümumilikdə isə Suriya ordusunda 8 min kamikadze hazırlanır.

BMT ekspertlərinin də Suriyanı tərk edəcəyi vaxt açıqlanıb. BMT baş katibi Pan Gi Mun bu gün bəyan edib ki, ekspertlər Suriyanı şənbə günü səhər saatlarında tərk edəcək.