Ərəb dünyasının ən böyük qəzeti Azərbaycandan yazdı

Birləşmiş Ərəb Əmirliklərində tanınmış “Əl-Fəcr” qəzetinin baş redaktoru Şərif Əl-Bəsil Azərbaycanda səfərdə olub. Lent.az-ın məlumatına görə, səfərdən sonra baş redaktorun ölkəmiz haqqında silsilə məqalələri çərçivəsində cari ilin 27 oktyabrda “Naxçıvan öz irsi və təbiətinin sehri ilə qəlbləri məftun edir və gözləri heyrətləndirir” başlıqlı məqaləsi (http://www.alfajr-news.net/node/123092) qəzetin çap və elektron nüsxələrində işıq üzü görüb.

Məlumat üçün bildirək ki, çap variantında müxtəlif rəngli şəkillərlə əhatə olunan qəzetin bir səhifəsi tamamilə məqaləyə həsr edilib.

Baş redaktor səyahət sevənlərə və elm adamlarına xitabən sehrli təbiətinə, mötədil havasına, müxtəlif turizm və tarixi yerlərinə, eləcə də müalicəvi sularına və zaman yaşında olan arxeolojı abidələrinə görə Naxçıvan Muxtar Respublikasının dünyanın ən gözəl guşələrindən və ən cəlbedici turizm istiqamətlərindən biri olduğunu qabardıb, möhtəşəm incəsənət işlərinin və memarlıq üslubunun sintezinin əks olunduğu bina və digər tikililərin gözəlliyinin Naxçıvan şəhərinə özünəməxsus unikallıq qazandırdığını oxucuların diqqətinə çatdırıb.

Ərəb və müsəlmanları öz mədəni ənənələrinə yaxın hesab edən yerli əhalinin xoş, qonaqpərvər və kəramətli rəftarı ilə rastlaşdığını vurğulayan Ş.Əl-Bəsil yuxarıda sadaladığı amillər və ləziz və çeşidli mətbəxin mövcudluğu ilə bərabər, əmin-amanlığın və sabitliyin hökm sürməsinin bu diyarın Körfəz turistləri üçün ideal istirahət məkanı etdiyini önə çəkib, son illər ərzində turizm sektorunda yaradılan şəraitin gələn qonaqların xəyallarında silinməz iz qoyduğunu xüsusilə qeyd edib.

Naxçıvanda səfəri müddətində iməcilik ənənəsi ilə üzləşdiyinə diqqət çəkən məqalənin müəllifi bu ənənənin əsasının Heydər Əliyevin muxtar respublikaya rəhbərliyi dövründən qoyulduğunu, hər şənbə günü keçirilən iməcilikdə Naxçıvan Ali Məclisinin Sədri Vasif Talıbovun şəxsən iştirak etdiyini və yerli camaatın həmin ənənədə fəal iştirakının torpağına və Vətəninə sevgidən qaynaqlandığını oxucuların nəzərinə çatdırıb.

Sonra məqalədə Naxçıvanda turizm və müalicəvi turizm sahəsində dünya standartlarına uyğun şəraitdən geniş bəhs edilib, Duzdağı Fizioterapiya Mərkəzi ətrafında dayanılıb, orada Naxçıvan Dövlət Universitetinin Tibb fakültəsini bitirmiş peşəkar mütəxəssislərin çalışdığı və Türkiyə, Rusiya, İsveçrə, Norveç və başqa ölkələrdən qonaqların gəldiyi barədə məlumat verilib.

Naxçıvandakı tarixi abidələrə gəlincə, bu mövzuda Ş.Əl-Bəsil VII əsrdə İslam memarlıq üslubunda tikilmiş Yəzdəgird qalası, Nuh türbəsi, Möminə Xatun türbəsi, Əshabi-Kəhf mağarası və ayrı-ayrı abidə və muzeylər haqqında müfəssəl məlumatlar təqdim edib, “Naxçıvan” sözünün “Nuhun diyarı” kimi də açıqlandığını məlumat üçün bildirib və ərəb turistlərinə həmin yerləri ziyarət etməyi tövsiyə edib. Eyni zamanda bu abidələrin bərpası və qorunması işində Heydər Əliyevin, eləcə də Azərbaycan Respublikasının Prezidenti cənab İlham Əliyevin və Naxçıvan Muxtar Respublikası Ali Məclisinin Sədri Vasif Talıbovun özəl diqqəti qeyd edilib, son illər ərzində Azərbaycanın digər yerlərində olduğu kimi, muxtar respublikada da hərtərəfli sürətli inkişaf haqda söhbət açılıb.

Bu xüsusda, baş redaktor Əliyevin təməlini qoyduğu, Ali Məclisinin Sədrinin rəhbərliyi altında yüksək səviyyədə həyata keçirilən inkişaf strategiyasının bəhrəsi olaraq əhalinin sosial rifahının daha da yüksəldiyini müşahidə etdiyini yazaraq, Naxçıvan Muxtar Respublikasında idman, incəsənət və mədəniyyət sektorları ilə yanaşı, avtomobil sənayesi, müalicəvi sular, xalçaçılıq, əl işləri, kənd təsərrüfatı və digər sahələrin yaxşı inkişaf etdiyini qabardıb, buranın dağlarında və dağlıq ərazilərində yetişən çiçək və otların çaya qatıldıqda inanılmaz dad verdiyini və insan orqanizmi üçün son dərəcə xeyirli olduğunu xüsusilə qeyd edib, Naxçıvanda bütün ərzaq məhsullarının orqanik olduğunu vurğulayıb.

““Naxçıvan şəhəri “ecazkar şəhər titulu”na layiqdir. Ona görə ki, bu şəhər məftunedici mənzərələrə malik sehrli təbiətə, yumşaq havaya, qədim tarixə, dəbdəbəli mehmanxanalara, möhtəşəm istirahət mərkəzlərinə malik və ən əsası da, əhalisi qonaqpərvərdir. Əshabi-Kəfin şəhəri olan Naxçıvan dünya şəhərlərinə oxşamayan unikal şəhərdir. Şəhərə səfər yaddaşlardan silinmir, insan qəlbini məftun edir və yenidən səfər etmək vurğunluğu yaradır” – deyə, Ş.Əl-Bəsil məqaləsini tamamlayıb.

Məqalədə, həmçinin Naxçıvanın dünyanın ən təmiz və ən təhlükəsiz guşələrindən biri olduğu, burada internetin bütün əraziləri əhatə etdiyi, fikir və ifadə azadlığının tam təmin olunduğu qabardılıb.