BMT Yaxın Şərq məsələsində “iki dövlət” prinsipinə sadiqdir

BMT katibliyi BMT Fələstin-İsrail münaqişəsinin nizamlanmasında “iki dövlət” prinsipini dəstəklədiyini təsdiqləyib. APA-nın “RİA Novosti”yə istinadən verdiyi xəbərə görə, bu barədə BMT baş katibinin rəsmi nümayəndəsi Farhan Xak Ağ Ev nümayəndəsinin ABŞ-ın Fələstin-İsrail münaqişəsinin nizamlanmasında tutduğu mövqeyinin dəyişə biləcəyinə münasibət bildirərkən vurğulayıb.

“Münaqişənin həllində “iki dövlət” prinsipini dəstəkləməyimiz barədə məlumatlısınız. Bundan əlavə şərh verməyəcəyəm”, - deyə Xak bildirib.

Qeyd edək ki, Ağ Evin yüksək vəzifəli nümayəndəsi bundan əvvəl ABŞ-ın Yaxın Şərq probleminin nizamlanmasında “iki dövlət” prinsipini təkid etməyəcəyini bildirib.

Bu vaxtadək ABŞ münaqişənin həlli məsələsində bölgədə iki suveren dövlətin – İsrail və Fələstinin yaradılması prinsipinə əsaslanıb.