Dəhşət: Ana 24 günlük körpəsini diri-diri basdırdı

Tailandda ana yeni doğulmuş körpəsini torpağa diri-diri basdıraraq öldürüb. Lent.az-ın Türkiyə mediasına istinadən verdiyi xəbərə görə, Fitsanulok şəhərində yaşayan 30 yaşlı Nathaphat Xonsakrom 24 günlük körpəsini pulsuzluq ucbatından öldürdüyünü etiraf edib: “Ərim də, mən də uzun müddətdir ki, işsizik. Pulumuz olmadığı üçün övladımı öldürmək məcburiyyətində qaldım”.

Bildirilir ki, Kvai Noi çayının kənarında sakitcə oturmuş qadını görən sakinlər polisə xəbər verib. Şahidlərin sözlərinə görə, Xonsakrom çayın qırağına gedən zaman qucağında uşaq olub. Polisin axtarışından sonra uşaq torpağa basdırılmış halda tapılıb. Uşağın bədənində xəsarət izləri aşkarlanmayıb.

Qadının əri 28 yaşlı Jittipan Saenqsuk həftənin bazar ertəsi həyat yoldaşının itkin düşdüyünü və yeni doğulmuş körpələrini də özü ilə apardığını açıqlayıb. Deyilənlərə görə, Jittipan Saenqsuk 2 gün əvvəl polisə arvadının özünə və uşağının canına qəsd edəcəyi məlumat verib.