Rusiyada partlayış baş verən binada xəsarət alan azərbaycanlıların kimliyi bəlli oldu - YENİLƏNİB

Rusiyanın İvanovo şəhərində yaşayış binasında baş verən partlayış nəticəsində yaralanan azərbaycanlı ər və arvadın şəxsiyyəti məlum olub.

APA-nın Rusiya bürosunun məlumatına görə, 1964-cü il təvəllüdlü Ələsgərov Elmar Famil oğlu və həyat yoldaşı 1964-cü il təvəllüdlü Ələsgərova Sinayə Şamil qızı xilasedicilər tərəfindən dağıntılar altından çıxarılıb.

E. Ələsgərova kəllə-beyin travması alıb. S. Ələsgərovanın durumu ağırdır. E. Ələsgərova və S. Ələsgərovanın övladları, partlayış dalğasının pəncərədən həyətə tulladığı 21 yaşlı Elvinin durumu yaxşıdır, hər hansı xəsarət almayıb.

***

Rusiyanın İvanovo şəhərində yaşayış binasında baş verən partlayış nəticəsində zərərçəkənlər arasında azərbaycanlı ailə də var.

APA-nın Rusiya bürosunun xəbərinə görə, bu barədə "Moskovskiy Komsomolets" qəzeti məlumat yayıb.

Qəzetin yazdığına görə, Ələsgərovla ailəsi 20 il bundan qabaq Azərbaycandan İvanovoya gəlib. Onların tanışı Vahid İbadovun bildirib ki, ailənin başçısı yaşadıqları evin yaxınlığındakı ərzaq mağazasında çalışır: "Həyat yoldaşı isə evdar qadındır. Onların 21 yaşlı Elvin adlı oğlu var. Partlayış baş verən zaman partlayışın dalğası Elvini pəncərədən həyətə tullayıb. Valideynləri isə içəridə qalıb. Lakin onları dağıntılar altından çıxartdılar və xəstəxanaya çatdırdılar. Baxmayaraq ki, vəziyyətləri ağırdır, deyilənə görə, onların həyatına heç bir təhlükə yoxdur. Bilmirəm ki, niyə bir sıra KİV-lər Elvinin anasının öldüyünü yazır. Biz günorta xəstəxanada idik, həkimlər bizə belə söz demədilər”.

Qeyd edək ki, noyabrın 6-da gecə saatlarında Rusiyanın İvanovo şəhərində yaşayış binasında güclü partlayış baş verib. Nəticədə 6 nəfər ölüb, 8 nəfər yaralanıb.