Brokkoli çantasından ilan çıxdı – Ürpədici görüntülər

Böyük Britaniyada kişinin mağazadan aldığı brokkoli çantasında ilan tapılıb.

Lent.az xəbər verir ki, 63 yaşlı Nevill Linton mağazadan özünə brokkoli alıb və evə gələndə yemək hazırlamaq üçün çantanı açdıqda şok yaşayıb. Bu zaman kişi çantadakı tərəvəzin içində ilan görüb. Sənaye təmizliyi ilə məşğul olan Nevil ilanlardan qorxduğu üçün yaxınları onun köməyinə qaçaraq sürünəni götürüblər.

İlan əvvəlcə vanna otağına atılıb. Sonra Nevilin tərəvəz aldığı mağazaya qaytarılıb.

“Bu, olduqca qorxulu idi. Mən ilanlardan qorxuram. Xoşbəxtəm ki, brokolini mətbəxdə qoymamışam, əks halda o indi evdə sürünürdü. Bu, bizim üçün böyük risk olardı”, - Linton bildirib.

Hadisədən sonra mağaza kişiyə təzminat təklif edib. Amma Nevil bundan imtina edib. O, üç uşaq atası olduğunu və təklif olunan məbləğin əlil oğlu, onunla birlikdə yaşayan qayınanası üçün riskli vəziyyətə qarşı kompensasiya etmədiyini deyib.

Bu arada ilan yaxınlıqdakı “Dadli” zooparkına aparılıb və orada onun zəhərli olmasa da, insanı şiddətlə sancmağa qadir olan cənub-qərbi Avropadan gələn nərdivan ilanı olduğu müəyyən edilib. Belə ilanlara ən çox Portuqaliyada, İspaniyada, Fransanın cənubunda və İtaliyanın bəzi ərazilərində rast gəlinir. Onlar təhdid edildikdə aqressivləşə bilər və pis qoxu yaymağa qadirdirlər.