Qəddafi müharibəni Avropaya keçirtməklə hədələdi

Lent.az-ın məlumatına görə, Qəddafi bildirib ki, NATO hərbi kampaniyanı dayandırmasa, Avropa qitəsinin ərazisinə hücum edəcək.

Polkovnik üzünü qərb ölkələrinə tutaraq deyib: “Liviyalılar gözəl günlərin birində Avropanı döyüş meydanına çevirmək iqtidarındadırlar. Orada qanuni hərbi hədəflər sizin evləriniz, ofisləriniz, ailələriniz olacaq. Necə ki, hazırda sizin hədəfinizdə bizim evlərdir”.

Bu hədələr Qəddafinin paytaxt Tripolinin əsas meydanına toplaşmış minlərlə tərəfdarına audio-müraciətində səsləndirilib. Onların cümə günü nümayişi son həftələrdə ən iri aksiyalardan olub.

Liviya lideri bunları vəd edib: “Biz sizinlə sizin bizimlə etdiyiniz kimi rəftar edəcəyik. Belə qərar verilsə, biz Avropaya çəyirtkə, arı beçəsi kimi doluşacağıq. Nə qədər ki, fəlakətlə üzləşməmisiniz, sizə ölkəmizdən rədd olmağı məsləhət görürük”.

Naməlum məkandan translyasiya olunan nitqində Qəddafi özünə qarşı vuruşan liviyalı üsyançıları satqın adlandırıb və tərəfdarlarını Fransanın qiyamçılara verdiyi silahları ələ keçirməyə çağırıb.

Bu günlərdə Fransanın qiyamçılara 40 ton silah, o cümlədən, tank əleyhinə raketlər verdiyi üzə çıxıb. Fransalı hərbçilər bu faktı qismən etiraf ediblər. Onların sözlərinə görə, Liviya müxalifəti raketlər yox, yalnız yüngül silahlar alıb. İstənilən halda, Fransa Qəddafi qüvvələrinə qarşı vuruşanları silahlandırdığını rəsmən etiraf edən ilk NATO ölkəsi olub.

Liviya liderinə dəstək məqsədilə çoxsaylı nümayişlər Haaqa Beynəlxalq Ali Məhkəməsinin Müəmmar Qəddafi və onun oğlu Seyf əl-İslamın həbsinə order verməsindən sonra keçirilib. Seyf əl-İslam “Russia Today”a müsahibəsində deyib ki, Liviya NATO üçün “McDonalds” kimi bir şeydir: “Onlar sürətli müharibəni “fast-food” kimi qəbul edirlər.

Qeyd edək ki, Qərbin Liviyada hərbi əməliyyatları martın 19-dan davam edir. Hərbi əməliyyatda Böyük Britaniya, ABŞ, Kanada, Belçika, İtaliya, İspaniya, Danimarka və Norveç iştirak edir. “Birləşmiş müdafiəçi” şərti adı alan və NATO-nun komandanlığı altında keçirilən əməliyyatın məqsədi silah daşınmasına, uçuşsuz zonaya embarqonun təmin edilməsi və vətəndaşların müdafiəsi üçün tədbirlərin görülməsindən ibarətdir. Mandat müddəti iyunun 27-də başa çatıb, lakin iyunun 1-də NATO əməliyyatı daha 90 gün – sentyabrın sonlarınadək uzadıb.