Medvedyevdən şok etiraf

Rusiya prezidenti Dmitri Medvedyev alkoqolizmə həsr olunmuş tədbirdə son illər Rusiyada alkoqola tələbatın azaldılması istiqamətində görülmüş tədbirlərin real nəticə vermədiyini söyləyib.
Lent.az-ın Rusiya mətbuatına istinadən yaydığı məlumata görə, prezident alkoqollu içkilərin istehsalı və dövriyyəsi ilə bağlı şəraitin sərtləşdirilməsinin, spirt reklamının məhdudlaşdırılmasının, içkili vəziyyətdə gəzməyə görə cəzanın səviyyəsinin yüksəldilməsinin heç bir müsbət dəyişikliyə səbəb olmadığını vurğulayıb.
Dmitri Medvedyev deyib ki, əgər açıq danışılsa, alkoqolizm Rusiyada ümummilli fəlakət xarakteri daşıyır.
O, Səhiyyə Nazirliyinin hesabatına da toxunub. Həmin hesabata görə, ölkədə yeniyetmələr də daxil olmaqla, il ərzində adambaşına 18 litr təmiz spirt düşür. Prezident qeyd edib ki, bu həcm Ümumdünya Səhiyyə Təşkilatının (ÜST) spirtlə bağlı bir insan üçün müəyyənləşdirdiyi normadan iki dəfə çoxdur: “Bu da insan sağlamlığı üçün təhlükəlidir”.
Dmitri Medvedyev hesab edir ki, alkoqolizmə qarşı mübarizə sistemli xarakter daşımalı və uzun müddət aparılmalıdır. O, alkoqolizmə qarşı uğurlu mübarizə aparan xarici ölkələrin təcrübəsindən də yararlanmağı zəruri sayıb.