“Cənub Axını” üç baş naziri bir araya gətirir

Ərdoğan, Putin və Berluskoni Ankarada görüşəcəklər

Rusiyanın baş naziri Vladimir Putin bu gün Ankaraya səfər edəcək.
Lent.az-ın Türkiyə mətbuatına istinadən yaydığı xəbərə görə, səfər Türkiyənin baş naziri Rəcəb Tayyib Ərdoğanın dəvətiylə gerçəkləşir.
Beləliklə, son 5 ildə 9-cu dəfə Putin və Ərdoğan bir araya gələcək. Türkiyə və Rusiya mətbuatı əsas müzakirə mövzusunun enerji məsələsi olduğunu yazır.
Müzakirələrdə “Mavi Axın-2” təbii qaz kəmərinin tikilməsi və İsrailə qədər uzadılması, Samsun-Ceyhan boru kəməri, “Cənub Axını” qaz kəmərinin Türkiyənin sahil sularından keçməsi, Tuz gölünda təbii qaz anbarının ruslar tərəfindən tikilməsi məsələləri əsas yer tutacaq.
Rusiya rəsmiləri Türkiyənin prinsipcə “Cənub Axını”nın sahil sularından keçməsini qəbul etdiyini bildirirlər.
Türkiyə mətbuatı bu gün İtaliyanın baş naziri Silvio Berluskoninin də Ankaraya gələcəyini və Vladimir Putinlə görüşlərə qatılacağını xəbər verib.

Qeyd edək ki, müzakirələrin Türkiyə və Rusiya baş nazirlərinin 9 sənədə imza atması gözlənilir. “Cənub Axını” layihəsi ilə bağlı sənədə isə Putin, Ərdoğan və Berluskonu imza atacaqlar.