“OMON” Qırmızı meydanı bağladı –

Moskvadakı Qırmızı meydan milis əməkdaşları tərəfindən tam mühasirəyə alınıb. Lent.az-ın Rusiya KİV-nə istinadən verdiyi məlumata görə, meydana gələn bütün küçələr, o cümlədən Manej meydanından gələn küçə nəzarətə götürülüb.

Manej meydanında “OMON”un çoxsaylı əməkdaşları və atlı polislər toplaşır. Qırmızı meydandakı bütün turistlərə ərazini tərk etmək əmr olunub. Görülən tədbirlərlə bağlı açıqlama verilmir.

Milis Kiyev vağzalı ətrafındakı insanları da sıxışdırıb çıxarıb. İnsanların əsas hissəsi metroya düşüb, digər hissəsi isə milisin müşayiəti altında Avropa meydanına doğru yönləndirilib.

Bundan əlavə, “Kiyev” metro stansiyası da bağlanılıb.

Milis əməkdaşları səsgücləndiricilər vasitəsilə insanları dağılışmağa çağırırlar. Buna baxmayaraq, Kiyev vağzalı ətrafında toplaşan kütlə millətçi şüarlar səsləndirir. Bir qrup şəxs “Ruslar, irəli” qışqıraraq Bryansk küçəsinə tərəf irəliləyir. Onları milis əməkdaşları izləyir. Bir neçə şəxs həbs olunub.

Eyni zamanda, Smolensk sahilətrafı rayonunda toqquşma başladığı və 5 nəfərin yaralandığı barədə məlumat daxil olub. Lakin rəsmi mənbələr informasiyanı təsdiqləməyə tələsmirlər.

Moskva qaynayır...