Ən çox silah alan ölkə Braziliyadır

“Congressional Research Service”-nin təqdim etdiyi raporta o da bildirilir ki, keçən il ərzində ən çox silah satan ölkə ABŞ olub. Müxtəlif ölkələrə 22,6 milyard dollar dəyərində hərbi əmlak satan superdövlət dünya bazarının 39 faizini əlində cəmləyib. Amma bu rəqəm 2008-ci illə müqayisədə xeyli azdır. 2008-ci ildə 38,1 milyard dollarlıq silah ixrac edən Birləşmiş Ştatlar bazarın yarısına nəzarət edirdi.

10,4 milyard dollar dəyərində silah-sursat satan Rusiya ABŞ-dan sonra ikinci yerdədir. Növbəti pilləni isə 7,4 milyard dollarla Fransa tutur ki, onu da Almaniya, İtaliya, Çin və İngiltərə izləyir.

Ən çox silah tədarük edənlər isə inkişaf etməkdə olan ölkələrdir. 2009-cu ildə satılan silahın təxminən 80 faizini (45,1 milyard dollar) bu ölkələr alıb. Bunların da önündə 7,2 milyard dollarla Braziliya gəlir. Digər böyük silah alıcıları isə 6,4 milyard dollarla Venesuela və 4,3 milyard dollarla Səudiyyə Ərəbistanıdır. Tayvan, Birləşmiş Ərəb Əmirlikləri, İraq, Misir, Vyetnam, Hindistan və Küveyt də silah idxal edən ölkələr arasında öndə gedir.