Hacıqabulda yaşadıqları yeri tərk edən koronavirus xəstələri barəsində cinayət işi başlanılıb - FOTO

Hacıqabulda yaşayış yerini tərk edən koronavirus xəstəsi barəsində cinayət işi başlanılıb, 2 nəfər barəsində isə araşdırma aparılır.

APA-nın Mil-Muğan bürosunun məlumatına görə, Hacıqabul Rayon Polis Şöbəsinə koronavirus testinin nəticəsi pozitiv çıxan şəhər sakini, 1958-ci il təvəllüdlü Əliyev Vaqif Əliqulu oğlunun yaşadığı Xalnar küçəsi, 2 ünvanını özbaşına tərk edərək başqa yaşayış məntəqəsinə - Şirvan şəhərinə getməsi məlum olub. Bu zaman adı çəkilən şəxs bir neçə avtomobil dəyişərək digər bir şəhərdə müxtəlif yerlərdə olub. Bu zaman epidemiya, sanitar-gigiyena və ya karantin rejimi qaydalarını pozaraq digər şəxslərin COVID-19 virusuna yoluxmasına risklər yaradıb, sağlam şəxslərin həyatını real təhlükədə qoyub. Toplanılan materiallar əsasında V.Əliyev barəsində cinayət məcəlləsinin 139-1.1 maddəsi ilə cinayət işi başlanılıb.

Digər tədbirlər çərçivəsində Hacıqabul Rayon Polis Şöbəsinin əməkdaşları ilə Hacıqabul Rayon Mərkəzi Xəstəxanasının həkim briqadası birgə reydlər zamanı COVID-19 virusuna yoluxan Hacıqabul şəhər sakinləri - S.Vurğun küçəsi 6 ünvanında yaşayan 1966-cı il təvəllüdlü Həsənov Rasim Bilal oğlu və Xətai küçəsi, ev 3 mənzil 6 ünvanında yaşayan Əhmədov Elşən Məzahir oğlu yuxarıda götərilən ünvanlarda aşkar edilməyiblər. Hacıqabul Rayon Polis Şöbəsinin əməkdaşları ilə Hacıqabul Rayon Mərkəzi Xəstəxanasının həkim briqadası yaşadığı ünvanı tərk edən həmin şəxsləri tibbi prosedurlar gözlənilməklə evlərinə qaytarıb və onlarla profilaktik söhbətlər aparılıb.

Hər iki şəxs barəsində Hacıqabul RPŞ tərəfindən araşdırma aparılır.