Vüsal Kərimli avtobuslarda yaranan sıxlıqdan DANIŞDI

SOSİAL

Ana səhifə
SOSİAL

12:03 2 aprel 2020

Vüsal Kərimli avtobuslarda yaranan sıxlıqdan DANIŞDI

"31 martdan saat 22:00-dan metro sərnişindaşıma fəaliyyətini dayandırıb. Bu gün sərnişindaşıma yerüstü nəqliyyat - avtobusla aparılır. Bu isə normal günlərdə aparılan daşıma deyil, xüsusi karantin rejimində aparılan sərnişin daşımalarıdır".

APA-nın məlumatına görə, bunu Nazirlər Kabineti yanında Operativ Qərargahın mətbuat konfransında Bakı Nəqliyyat Agentliyinin İdarə Heyətinin sədri Vüsal Kərimli bildirib. Onun sözlərinə görə, müxtəlif ölkələrdə ictimai nəqliyyatda müəyyən məhdudiyyətlər tətbiq edilib: "Bəzi ölkələrdə ictimai nəqliyyat 2 saat işləyir, bəzilərində tam ləğv olunub. Azərbaycanda hökumətin humanist yanaşması ilə həyati əhəmiyyətli fəaliyyət sahələrində təchizatda qırılma olmasın deyə xidmət edirik. Fevralın 27-dən bütün avtobuslar dezinfeksiya edilir, sürücülərə maska və əlcək verilib. Ölkədəki 30-a yaxın daşıyıcı ilə profilaktik iş aparılır".

V.Kərimli deyib ki, 1 apreldə müəyyən sıxlıq yaranıb: "Bu günlərdə normal avtobuslarla yanaşı, ekspress avtobuslar da işləyir. 31 martda ekspress xətlərlə təxminən 11 minə yaxın daşıma edilmişdisə, dünən 27 minə yaxın daşıma həyata keçirilib. Avtobus cəhətdən çatışmazlıq yoxdur, sadəcə dövlətin apardığı tədbirlə həmrəy olmaq lazımdır. Ümumilikdə, dünən saat 7.00-la saat 10.00 arası 95 ekspress avtobusla 21 min sərnişin daşınıb, 4600-a yaxın adam özəl daşıyıcılarla gedib. Saat 17.00-20.00 arası 24 minə yaxın sərnişin daşınıb. Hər bir ekspress xətdə əlavə 85 avtobus var".