465
09:00
13 Noyabr 2019

Ən çox uşaqların ölümünə səbəb olan bu xəstəlikdən necə  qorunmaq olar?

Pnevmoniya ağciyərlərin yoluxucu xəstəliyidir, əsasən hava-damcı yolu ilə ötürülür. Müxtəlif növ viruslar, bakteriyalar və göbələklər sətəlcəmin törədicisi ola bilər. Xəstəliyin simptomatikası onu doğuran səbəblərdən, pasiyentin yaşından və sağlamlıq vəziyyətindən asılıdır. Ağciyər pnevmoniyası qripəbənzər əlamətlərlə kəskin respirator xəstəlikləri və kəskin respirator virus infeksiyaları fonunda inkişaf edir. Həkim məsləhəti olmadan temperaturu aşağı salan preparatlar qəbul etdikdə sətəlcəmin yaranma və ya ağırlaşma riski artır, infeksiyanın tənəffüs yolları ilə aşağı yayılmasına və ağciyərdə infeksiya mənbələrinin yaranmasına səbəb olur. Pnevmoniyanın profilaktikası düzgün diaqnozun vaxtında qoyulmasıdır.

e-tibb.az-ın xəbərinə görə, bu barədə Səhiyyə Nazirliyi mətbuat xidmətinin 12 noyabr Dünya Pnevmoniya ilə Mübarizə Günü ilə bağlı yaydığı məlumatda bildirilir.

Qeyd olunub ki, pnevmoniyadan, ilk növbədə, uşaqlar əziyyət çəkirlər. Dünyada həddi-buluğa çatmamışların ölüm faizinin əsas səbəbi pnevmoniyadır və bu xəstəlik hər il beş yaşınadək olan 1,1 milyona yaxın uşağın həyatına son qoyur. Bu, QİÇS, malyariya və qızılcadan ölənlərin birgə statistik göstəricisindən daha çoxdur.

Hər il noyabrın 12-si Dünya Pnevmoniya ilə Mübarizə Günü kimi qeyd edilir.

Həmin gün Uşaq Pnevmoniyasına qarşı Qlobal Koalisiyanın təşəbbüsü ilə təqvimə salınıb. Koalisiya beynəlxalq, hökumət, qeyri-hökumət və yerli təşkilatlarını, elmi-tədqiqat və tədris institutlarının, fondların və fəallarını öz ətrafında birləşdirir və pnevmoniyanın probleminə dövlət xadimlərinin, səhiyyənin və potensial donorların mütəxəssisləri diqqətini cəlb etməyə çalışır.

2009-cu ildə Dünya Səhiyyə Təşkilatı UNİSEF-lə birgə “Pnevmoniyanın profilaktikası və xəstəliyə qarşı qlobal fəaliyyət planı”nı elan edib. Həmin planın məqsədi uşaqların müdafiəsi üzrə kombinə edilmiş tədbirlərlə sətəlcəmlə mübarizəni, xəstəliyin profilaktika və müalicəsinin təkmilləşdirilməsidir.

Azərbaycanda yoluxucu xəstəliklərə qarşı mübarizə dövlət siyasətinin sosialyönümlü prioritet istiqamətlərindən biridir. Nazirlər Kabinetinin təsdiqlədiyi “2016-2020-ci illər üçün uşaqlar arasında yoluxucu xəstəliklərin immunoprofilaktikasına dair tədbirlər proqramı” uşaqlar arasında xəstəliyin azaldılmasına yönələn mühüm sənəddir. İndi Avropanın inkişaf etmiş ölkələrində olduğu kimi, Azərbaycanda da 11 yoluxucu xəstəlik – qızılca, məxmərək, parotit, difteriya, göy öskürək, tetanus və başqa xəstəliklər əleyhinə planlaşdırılmış şəkildə aparılan peyvəndləşdirmə tədbirləri ölkənin bütün uşaqlarını əhatə edir. Aparılan tədbirlər nəticəsində, həmçinin immunlaşdırma işlərinin daim təkmilləşdirilməsi və immunoprofilaktika sayəsində infeksion xəstəliklərə tutulma hallarının azaldılması istiqamətində sabit dinamika əldə olunub.

e-tibb.az