Bu ərazilərdə yağış suları təhlükə yaratmayacaq - <span style="color:red;">YENİ LAYİHƏ
17 sentyabr 2019 19:48 (UTC +04:00)

Bu ərazilərdə yağış suları təhlükə yaratmayacaq - YENİ LAYİHƏ

 “Azərsu” Açıq Səhmdar Cəmiyyəti Bakı şəhərinin yağış sularının yığılma təhlükəsi olan qəsəbələrində səth sularının kənarlaşdırılması məqsədilə yeni layihələrin icrasına başlayıb. 
 
“Azərsu”nun ictimaiyyətlə əlaqələr şöbəsindən Lent.az-a verilən məlumata görə, hazırda 5 yaşayış məntəqəsini əhatə edən layihələrdən biri Sabunçu rayonunun Zabrat qəsəbəsində icra olunur. 
 
Bildirilib ki, yeni yaradılan infrastruktur istismara veriləndən sonra yağış sularının yığılma təhlükəsi aradan qaldırılacaq:
 
"Bakı şəhəri, Sabunçu rayonunun 2-ci Zabrat yaşayış massivi adlanan ərazisində səth və qrunt sularının kənarlaşdırılması məqsədilə mərkəzləşdirilmiş yağış-kanalizasiya sistemləri olmayıb. Son illər ərazidə məskunlaşmanın artması səth və tullantı sularının axıdılmasını aktuallaşdırılıb. İntensiv yağıntılar zamanı ərazidə subasmanın qeydə alınması sakinlər üçün narahatlıq doğurmaqla yanaşı, antisanitar vəziyyətin yaranmasına səbəb olub. 
 
Yaşayış massivində subasmaların aradan qaldırılması məqsədilə “Azərsu” Açıq Səhmdar Cəmiyyəti layihə hazırlayıb və qısa müddətdə işlərə başlanılıb. Layihəyə əsasən, ərazidə 3,6 kilometr uzunluğunda yağış-kanalizasiya şəbəkəsi və kollektoru inşa olunur. Yeni yaradılan şəbəkə üzərində baxış quyuları tikilir. Burada yaranan səth və qrunt suları yaxınlıqdan keçən mövcud kollektora ötürüləcək. Bu məqsədlə ərazidə nasos stansiyası inşa edilir. Layihə üzrə tikinti-quraşdırma işlərinin cari ilin sonuna qədər başa  çatdırılması nəzərdə tutulur". 
 
Qeyd edək ki, hazırda “Azərsu” Zabrat qəsəbəsi də daxil olmaqla 5 yaşayış məntəqəsində - Biləcəri, Mehdiabad, Ramana və Bahar qəsəbələrində yağış və kanalizasiya xətlərinin tikintisini davam etdirir. Bu layihələr çərçivəsində 20 kilometrdən çox kanalizasiya xətlərinin inşası nəzərdə tutulub. Bu ilin sonuna qədər layihələr üzrə nəzərdə tutulan işlərin başa çatdırılması planlaşdırılır. Bu layihələrin icrası nəticəsində subasma təhlükəsi olan ərazilərdə su yığılmalarının qarşısı alınacaq. Layihələrin icrası əhalinin məişət şəraitinin yaxşılaşdırmaqla yanaşı, ekoloji baxımdan da mühüm əhəmiyyət daşıyır.   
 
# 550
avatar

Fəxriyyə Mahmudova

Oxşar yazılar