597
10:06
14 Sentyabr 2019

Türk qadın Almaniyada ilin həkimi seçildi

Avropada tam süni ürək əməliyyatı aparan yeganə qadın həkim olan və ötən aylarda Almaniyanın ən nüfuzlu mükafatlarından biri olan Victress mükafatına layiq görülən Dilək Gürsoy, bu dəfə də "İlin həkimi” mükafatını qazanıb.
Lent.az xarici KİV-ə istinadla xəbər verir ki, German Medical Award tərəfindən "İlin həkimi” mükafatına layiq görülən Gürsoy deyib: "Bir qadın olaraq belə bir uğura görə çox xoşbəxtəm. Bütün maneələrə baxmayaraq, işimi ən yaxşı şəkildə görürəm və bunu daha da inkişaf etdirəcəyəmə inanıram. İşlərimdən və ictimai fəaliyyətlərdən dolayı məni bu mükafata layiq görən qurumda Almaniyanın ən yaxşı həkimləri toplaşıblar. Yekdilliklə seçilmişəm, çox şərəf duydum".
Dilək Gürsoy böyük hədəfləri olduğunu da vurğulayıb: “Bir süni ürək mərkəzi açmaq istəyirəm. İşimi görərkən çox təzyiqlərlə qarşılaşdım və qarşılaşmaya da davam edirəm. Amma bunlar mənə mane olmayacaq. Mən qorxmadan, bildiyim yolda irəliləməyə davam edəcəyəm. Çox gözəl işlər görəcəyəmə inanıram. Bir qadın olaraq xüsusilə kişi həmkarlarımın maneçilikləri ilə qarşılaşdım, amma ən yaxşı bildiyim işi, ən yaxşı şəkildə etməyə davam edəcəyəm. 18 ildir ki, bu işi edirəm, heç kim məni yolumdan döndərə bilməz".
Mükafat mərasiminin Dusseldorfda noyabrın 18-də Avropa Tibb Sərgisində keçiriləcəyini deyən həkim Gürsoy, eyni zamanda sərgidə süni ürək sahəsindəki fəaliyyəti ilə bağlı təqdimat da edəcək.