Tankçılarımız Rusiyada 24 ölkə arasında 4-cü oldu - FOTO

Rusiyada V Beynəlxalq Ordu Oyunları başa çatıb.

Rusiya daxil olmaqla 10 ölkədə keçirilən oyunlara Moskva vilayətinin Kubinka rayonunda yerləşən Alabino poliqonunda baş tutan “Tank biatlonu” müsabiqəsi ilə yekun vurulub.

APA -nın Moskva müxbirinin verdiyi məlumata görə, müsabiqənin finalında Azərbaycan , Rusiya, Belarus və Qazaxıstan komandaları mübarizə aparıblar.

Müsabiqənin qalibi Rusiya komandası olub. Azərbaycan komandası isə “Tank biatlonu” müsabiqəsində 24 ölkə arasında 4-cü yeri tutub.

Müsabiqənin final mərhələsini Azərbaycanın Müdafiə naziri general-polkovnik Zakir Həsənov da izləyib.

Bundan öncə isə Zakir Həsənov rusiyalı həmkarı Sergey Şoyqu ilə bilrlikdə Alabino poliqonunda açılan Dostluq Evindəki Azərbaycan pavilyonu ilə tanış olublar.

Daha sonra V Beynəlxalq Ordu Oyunlarının bağlanış mərasimi keçirilib.