Minlərlə il işləyə bilən batareya hazırlandı

İngiltərədəki tədqiqatçılar dünyanın ilk karbon-14 almaz batareyasını hazırlayıblar. Bu inqilabi batareya, minlərlə il işləməklə yanaşı, təhlükəsiz və davamlı bir həll yolu təqdim edir.

Lent.az xarici KİV-ə istinadən xəbər verir ki, karbon-14 almaz batareyası, radioaktiv bir izotop olan karbon-14-ün radioaktiv parçalanmasından elektrik istehsal edir. Dünyanın ən sərt materiallarından biri olan almazla əhatə olunan batareya, radiasiyanı təhlükəsiz şəkildə toplayaraq enerji istehsal edir. Karbon-14, almaz mühafizəsi vasitəsilə udulan qısa məsafəli radiasiya yayaraq aşağı səviyyədə elektrik istehsal edir və eyni zamanda təhlükəsizliyi təmin edir. Bu batareya, günəş panelləri kimi işləyir, lakin işığı elektrikə çevirmək əvəzinə, radioaktiv parçalanma nəticəsində yaranan sürətlə hərəkət edən elektronlardan istifadə edir. Karbon-14-ün yarı ömrü 5700 il olduğundan, batareya nəzəri olaraq minlərlə il işləyə bilər.

Karbon-14 almaz batareyalarının ən ümidverici tərəflərindən biri çoxfunksionallığıdır. Bu batareya, ənənəvi enerji mənbələrinin qeyri-praktik olduğu müxtəlif mühitlərdə və cihazlarda istifadə edilə bilər. Məsələn, ürək batareyaları, eşitmə cihazları və göz cihazları kimi implantlara enerji təmin edərək səhiyyə sahəsində inqilab yarada bilər. Tez-tez dəyişdirilməsi tələb olunan ənənəvi batareyalardan fərqli olaraq, almaz batareya on illərlə davam edə bilər.

Bundan əlavə, bu batareyalar kosmik missiyalar üçün də əlverişli ola bilər. Kosmik aparatlara, peyklərə və hətta radio tezlikli (RF) etiketlərə on illərlə enerji təmin edərək xərcləri azalda və onların əməliyyat ömrünü uzada bilər. Bu batareyalarda istifadə olunan karbon-14, nüvə reaktorlarının yan məhsulu olan qrafit bloklarından əldə edilir. Beləliklə, radioaktiv materialın təkrar istifadəsini təmin edərək nüvə tullantılarının azalmasına töhfə verir. Eyni zamanda, nüvə tullantılarının saxlanması probleminə də həll yolu təqdim edir.