Gələcəyin nəqliyyat vasitəsi belə olacaq -FOTOLENT -VİDEO

Kawasaki şirkəti CORLEO adlı futuristik robot-atı təqdim edib - bu, gələcəyin konseptual nəqliyyat vasitəsidir.

Lent.az xəbər verir ki, bu barədə New Atlas məlumat yayıb.

CORLEO dörd ayaq üzərində hərəkət edir, atlının bədən hərəkətləri ilə idarə olunur və hidrogenlə işləyir. Süni zəka və stabilizasiya sistemi ilə təchiz olunmuş bu robot çətin relyeflərdə naviqasiyanın öhdəsindən gələ bilir. Hələlik bu, sadəcə bir prototipdir, lakin Kawasaki şirkəti inanır ki, bu cür cihazlar 2050-ci ilə qədər reallığa çevrilə bilər. Robot 2025 Osaka Kansai Expo sərgisinin təqdimatında elan edilib. Yapon konseptlərinə xas olduğu kimi, CORLEO hidrogen yanacaq elementləri ilə işləyir və görünür ki, elektrik ötürücüsündən istifadə edir. Robotun arxa ayaqları əlavə oynaqlarla təchiz olunub ki, bu da zərbələr zamanı amortizasiyanı yaxşılaşdırır.

New Atlas nəşrinin zarafatla yazdığına görə, bu xüsusiyyətlər yəqin ki, atlıları yerə atmaq, arxa ayaqları üstə qalxmaq və robot müharibəsi başladıqda silaha sarılmaq üçün lazım olacaq. Onun ikiyə bölünmüş “dırnaqları” sürüşməyən rezin səthlə örtülüb. Tənzimlənə bilən üzəngilər fərqli boyda atlılar üçün uyğundur. Atlı robotu sadə sükan vasitəsilə idarə edə bilər, oturacaq isə “üzən konstruksiya” prinsipi ilə hazırlanıb - kifayət qədər uzundur ki, bir sərnişin də yerləşə bilsin. Robot ön tərəfdə külək şüşəsi ilə təchiz olunub ki, bu da yalnız cihazın sürətinin 80 km/saatdan yuxarı olan qaçışa hesablandığı halda məntiqli görünür. Onun arxa hissəsində isə kiçik rəngli cihaz paneli yerləşir.

Videodan göründüyü kimi, CORLEO ekstremal off-road (sərt relyef) üçün yaradılıb - o, pişik zərifliyi ilə daşların üzərindən atıla bilir və mürəkkəb relyefi dəf edir. Onun süni zəka sistemi ərazini analiz edir və ayaqları üçün optimal dayaq nöqtələrini seçir. İdarəetmənin əsas siqnalı isə süvarinin bədən hərəkətləridir. Gecə vaxtı robot yolu işıqlandırır və istiqamət göstərici oxlarla növbəti hərəkətlərini göstərir. Doğrudur, təqdimat videosu kompüter qrafikasından ibarətdir və layihənin özü daha çox konseptual xarakter daşıyır. Reallıqda isə Kawasaki Heavy Industries yalnız balans saxlaya və mövqe dəyişə bilən bir prototipi nümayiş etdirib. Şirkət bildirir ki, bu, 2050-ci ilə hesablanmış gələcəyin nəqliyyat vasitəsi konsepsiyasıdır.