Nazirlik Qubadakı ailəyə köməklik göstərdi

Bir qədər əvvəl yerli mediada Quba rayonunda baş verən ağır ailə dramı barədə yayılan məlumatla əlaqədar həmin ailəyə Əmək və Əhalinin Sosial Müdafiəsi Nazirliyi tərəfindən müvafiq köməklik göstərilib.

Lent.az-a bu barədə nazirliyin mətbuat katibi Fazil Talıbov məlumat verib. O bildirib ki, ailəyə təyin olunan ünvanlı dövlət sosial yardımı öz ailəsinə qarşı qatı cinayət törətməsi səbəbindən hazırda həbsdə olan “ailə başçısı”nın adına olub:

“Ailənin xanımının istəyi nəzərə alınmaqla, həmin yardımın istiqaməti dəyişdirilib. Yəni o, ailəni təmsil edən şəxs qismində sosial yardımı almaq üçün elektron qaydada müraciət etdikdən sonra ailəyə 01.05.2019-cu il tarixindən aylıq 338,43 manat məbləğində sosial yardım (ailənin xanımın adına) təyin olunub.

Həmin ailə nazirlik yanında Dövlət Sosial Müdafiə Fondu tərəfindən himayəyə götürülərək, ailənin azyaşlı uşaqlarının itirilmiş sənədlərinin bərpasına da köməklik göstərilib”.