Güneyli jurnalist həbsxanadakı acınacaqlı durumdan yazıb

Tehranın Evin həbsxanasında saxlanılan tanınmış azərbaycanlı jurnalist, hüquq müdafiəçisi Səid Mətinpur aclıq aksiyasına başlayıb.

Lent.az-ın İranda insan haqları müdafiəçisi təşkilatına, HRANA-ya istinadən məlumatına görə, S.Mətinpur zindandan yazdığı məktubunda bu haqda bildirib.

Məhbus jurnalist onunla eyni kamerada saxlanılan başqa azərbaycanlı ictimai-fəala dəstək olmaq üçün aclıq aksiyasına başladığını yazıb: “ İşçilərin hüquqlarının müdafiəsi üzrə azərbaycanlı fəal Rza Şəhabi həbs edilən zaman ağır işgəncələrə məruz qalıb. Nəticədə onun onurğa sütunu ciddi zədələnib.

R. Şəhabi müalicə olunması üçün dəfələrlə müraciət etsə də, hələ də xəstəxanaya göndərilməyib. Hazırda səhhəti ağır olan R.Şəhabinin müalicə almağa çox ehtiyacı var. Əks halda iflic ola bilər. Xəstəxanaya göndərilməməsinə etiraz olaraq, o, 20 gündür aclıq aksiyasına başlayıb. Azərbaycanlı fəala dəstək olmağı özümə mənəvi borc bildim və mən də yanvarın 5-dən aclıq aksiyasına başladım. Bunu hər bir azərbaycanlı edərdi”.

S.Mətinpur onu da yazıb ki, saxlanıldığı kamerada müalicəyə ehtiyacı olan başqa məhbuslar da var: “ Mən 3 il yarımdır həbsdəyəm. Burada baş verən cinayətlərin içərisində yaşayıram. Mənimlə eyni kamerada qalmış 4 məhbus artıq edam edilib. Bir neçə nəfər isə vaxtında müalicə almadığı üçün ölüb. İndi də səhhəti ağır olan və tibbi yardım göstərilməyən bir neçə nəfər var. Rza Şəhabi də onlardan biridir”.

Qeyd edək ki, S. Mətinpur 2008-ci ildə Tehran İnqilab Məhkəməsinin 15-ci şöbəsi tərəfindən 8 il azadlıqdan məhrum edilib. O, «əcnəbilərlə əlaqəyə girərək İranın dövlət quruluşuna qarşı təbliğat aparmaqda» təqsirləndirilib.