Çin maşınları Avropanı qorxudub: Casusluq üçün istifadə edilə bilər

Avropa Çin avtomobillərinin internetə çıxışı olduğundan və gizli şəkildə Pekinə hesabat verə biləcəyindən narahatdır.

Avropa İttifaqı Çinin Avropa bazarında satılan Çin istehsalı olan avtomobillərdən casusluq məqsədilə istifadə edə biləcəyindən narahatdır.

Lent.az bildirir ki, bu barədə “Politico” yazır.

Ötən həftənin əvvəlində ABŞ hökuməti öz ərazisində avtomobilləri internetə qoşmaq üçün Çin texnologiyalarına qadağa qoymaq niyyətini açıqlayıb. İndi Avropa rəsmiləri Çinin casusluğu ilə bağlı oxşar narahatlıqlarını ifadə ediblər.

Avropa Komissiyasının rəqəmsallaşdırma və rəqabət üzrə komissarı Marqret Vestaqer jurnalistlərə bildirib ki, internetə qoşulan avtomobil "hər şeyi olduğu yerdə qeyd edə bilər və o, həmçinin bu məlumatları məlumatlara çıxışı olanlara ötürə bilər".

Onun sözlərinə görə, Avropa İttifaqı xidmətləri hazırda iqtisadi təhlükəsizlik ekspertləri ilə birlikdə bunu öyrənir.

“Politico”nun qeyd etdiyi kimi, Çin avtomobil texnologiyasına diqqət süni intellekt, mikroçiplər və 5G rabitəsi kimi əsas texnologiyalara kimin nəzarət etməsi ilə bağlı ABŞ, Çin və digər regionlar arasında davam edən mübarizədə başqa bir cəbhə açır.

"Rəqabətin əsas səbəbi casusluq qorxusu, təxribat, iqtisadi məcburiyyət taktikası və təchizat zəncirinin pozulmasıdır. Bu, Avropanın Pekin tərəfindən subsidiya verilən elektrikli nəqliyyat vasitələrinə ticarət tarifləri tətbiq etdiyi, Çin avtomobillərinin blok bazarını su basmasını dayandırmağa çalışdığı bir vaxtda da baş verib", - nəşr yazır.

Kanada və Böyük Britaniya da Çin məhsulları ilə bağlı təhlükəsizlik problemlərini həll etmək üçün qadağalar və ya digər qanunlar tətbiq etməyi düşünür.