Türkiyədən İsrailə TƏHDİD: Üç günə Təl-Əvivə girə bilərik

Türkiyə bəyan edib ki, qoşunları “lazım gələrsə” üç gün ərzində Qüdsə çata bilər.

Türkiyənin CNN Türk telekanalında çıxış edən Türkiyə araşdırma institutunun rəhbəri Hakan Bayrakçı bildirib ki, lazım gələrsə, Türkiyə ordusu 72 saat ərzində Təl-Əvivə daxil ola bilər.

Lent.az-ın xarici KİV-ə istinadla xəbərinə görə, o, bu bəyanatın nə hədə, nə də şişirtmə olmadığını, özünün dediyi kimi, “Türkiyənin çəkindirici gücünün nümayişi” olduğunu bildirib.

Təxribatçı ritorika Qüds və Ankara arasında həm Qəzza zolağında davam edən müharibə, həm də Türkiyənin müharibədən sonrakı Suriyadakı fəal rolu ilə alovlanan münaqişənin dərinləşdiyi bir vaxta təsadüf edir. İsraildə Bayrakçının bəyanatı rəsmi Ankaranın birbaşa və görünməmiş düşmənçilik təzahürü kimi qəbul edilib.

ABŞ prezidenti Donald Trampın İsrailin baş naziri Benyamin Netanyahu ilə görüşündən sonra Ərdoğana nümayişkaranə kompliment deyərək, Türkiyə liderini “dost” adlandırıb və “onu sevir” dedikdən sonra vəziyyət xüsusilə həssaslaşıb. Bu, Qüdsün Türkiyəni Suriyada artan hərbi və siyasi təsirinə görə kəskin tənqid etdiyi bir vaxta təsadüf edir.

Netanyahu buna cavab olaraq Türkiyə ilə münasibətlərin ciddi şəkildə pisləşdiyini və İsrailin Suriya ərazisinin təhdidlər üçün tramplin olmasına icazə verməyəcəyini vurğulayıb. Tramp isə öz növbəsində İsrailə Ankara ilə münasibətləri yaxşılaşdırmağa kömək edə biləcəyinə əminliyini ifadə edib – əgər onun əlavə etdiyi kimi, “baş nazir kifayət qədər ağıllıdırsa”.