İsa Qəmbərin oğlu istintaqa ifadə verdi

“Mənə İP-in fəaliyyətinin nələrdən ibarət olduğu, Koordinasiya Şurasında kimlərin təmsil olunduğu, 2 aprel aksiyası zamanı harada olduğumu, mitinqdə kimləri gördüyümü və s. Kimi suallar verdilər”.

Bu sözləri Lent.az-a açıqlamasında aprelin 27-də Bakı Şəhər Baş Polis İdarəsində dindirilən Müsavat başqanı İsa Qəmbərin oğlu Turqut Qəmbər deyib. Onun sözlərinə görə, adını xatırlamadığı bir müstəntiq tərəfindən keçirilən dindirmə 3 saat yaxın çəkib: “Dindirilmə zamanı mənimlə kifayət qədər nəzakətli davrandılar. Müddətin bu qədər uzanmasının səbəbi isə sualların çoxluğu ilə bağlıdır”.

2 aprel mitinqi ilə bağlı başladılmış istintaq çərçivəsində ona ünvanlanan bütün suallara uyğun cavabları verdiyini qeyd edən Turqut Qəmbər dindirmənin prosedur qaydadan kənara çıxmadığını söyləyib.

Xatırladaq ki, T.Qəmbər 2 aprel mitinqi ilə bağlı başlanan cinayət işinin istintaqına şahid qismində ifadə verməsi üçün aprelin 27-i saat 15:00-da Bakı Şəhər Baş Polis İdarəsinə çağırılmışdı.

Anar Gəraylı