Xərçəngin ən təhlükəli növləri - Nəyi bilməlisiniz

Alimlər xərçəng xəstələrinin ölüm nisbətinin təhlilini aparıb və onların nəticələrini bölüşüblər.

Onkoloqlar xərçəng xəstələri arasında ölüm nisbətini müəyyən etmək üçün araşdırma aparıblar.

Lent.az-ın xarici KİV-ə istinadla xəbərinə görə, mütəxəssislər diaqnoz qoyulandan sonra cəmi bir il ərzində ölümlə nəticələnə bilən ən aqressiv xərçəng növlərini müəyyən ediblər.

Statistikaya görə, həzm sisteminin bədxassəli şişləri ən təhlükəli hesab olunur. Xüsusən də qida borusu xərçəngi xəstəliyin aşkarlanmasından sonrakı ilk il ərzində xəstələrin 60 faizə yaxınının həyatını alır.

Ağciyər xərçəngi ölüm nisbətinə görə ikinci yerdədir və xəstələnənlərin demək olar ki, yarısı üçün ölümcüldür. Üçüncü yeri bir il ərzində xəstələrin 47 faizinin ölümünə səbəb olan mədə xərçəngi tutur.

Ekspertlər vurğulayırlar ki, xəstəliyin proqnozunda həlledici amil onun aşkar olunduğu mərhələdir. Bir çox insanlar həkimə çox gec müraciət edirlər ki, bu da onların uğurlu müalicə şanslarını əhəmiyyətli dərəcədə azaldır.

Bir il ərzində yüksək ölümlə xarakterizə olunan digər onkologiya növləri arasında mütəxəssislər qan xərçəngini (22 faiz hallarda), düz bağırsaq xərçəngini (21 faiz), həmçinin xəstələrin müvafiq olaraq 13 və 6 faizinin həyatına son qoyan uşaqlıq boynu və döş xərçəngini qeyd edirlər.

Xərçəngin inkişafının əsas səbəbləri arasında siqaret, alkoqol istehlakı, kanserogenlərə məruz qalma və irsi meyllilik daxildir. Risk altında olan insanlara mütəmadi olaraq tibbi müayinədən keçmələri tövsiyə olunur.

Erkən diaqnoz bizə bir şişi erkən mərhələdə aşkar etməyə imkan verir ki, bu da uğurlu müalicə və ömrün uzadılması ehtimalını əhəmiyyətli dərəcədə artırır.