Soyuq duş qəbul edən bu insanlara XƏBƏRDARLIQ: Siz də onların arasındasınız?

Həkimlər və fizioloqlar qeyd edirlər ki, orqanizmin qəfil soyuq təsirinə reaksiyası fərdi xarakter daşıyır və bir çox amillərdən – sağlamlıq vəziyyəti, yaş, adaptasiya səviyyəsi və xroniki xəstəliklərin olub-olmamasından asılıdır.

Lent.az-ın xarici mediaya istinadla xəbərinə görə, temperaturun kəskin dəyişməsi bəzi insanlar üçün ciddi stressə çevrilə və arzuolunmaz, hətta həyati təhlükə yaradan nəticələrə səbəb ola bilər.

Soyuq duşda kimlər xüsusilə ehtiyatlı olmalı və ya tamamilə uzaq durmalıdır?

Ən həssas qrup ürək-damar xəstəliklərindən əziyyət çəkən insanlardır. Bədənə qəfil soyuq suyun düşməsi damarların spazmına – yəni istiliyi qorumaq məqsədilə yaranan reflektor reaksiyaya səbəb olur. Bu isə qan təzyiqinin sürətli yüksəlməsinə və ürək döyüntüsünün artmasına gətirib çıxarır. Bu hallar xüsusilə aşağıdakı şəxslər üçün təhlükəlidir:

Hipertoniya xəstələri

Qəfil təzyiq artımı hipertenziv kriz yarada bilər, bu isə insult və ya infarktla nəticələnə bilər.

İşemik ürək xəstəliyi (İÜX), stenokardiya

Ürəyin qidalanmasını təmin edən tac damarların spazmı stenokardiya tutmasına və ya hətta kəskin miokard infarktına səbəb ola bilər.

Aritmiyalı şəxslər

Temperaturun kəskin dəyişməsi ürək ritmini poza bilər.

Əvvəllər infarkt və ya insult keçirmiş şəxslər

Bu kimi şəxslər üçün təzyiqin və ürək yükünün qəfil dəyişməsi son dərəcə təhlükəlidir.

Bundan əlavə, soyuq duş aşağıdakı sağlamlıq problemləri olan insanlar üçün də risklidir

Tənəffüs orqanları xəstəlikləri olanlar

Xüsusilə kəskinləşmə dövründə. Soyuq hava və ya su bronx spazmı yarada, öskürəyi artıraraq astma, xroniki bronxit kimi hallarda nəfəs darlığına səbəb ola bilər.

Böyrək və sidik-cinsiyyət sistemi xəstəlikləri olanlar

Soyuq təsir piyelonefrit, sistit kimi iltihabi halları daha da ağırlaşdıra bilər.

Periferik damar xəstəlikləri olan şəxslər

Məsələn, Reynau xəstəliyi zamanı soyuq ətraf damarlarının güclü spazmına səbəb olur.

Soyuqdəymə və virus infeksiyası olanlar

Yüksək temperatur zamanı soyuq duş orqanizm üçün əlavə stressdir və vəziyyəti ağırlaşdıra bilər.

Hamilə qadınlar

Temperaturun qəfil dəyişməsi hamiləliyin gedişinə mənfi təsir göstərə bilər.

Alkoqollu vəziyyətdə olan şəxslər

Alkoqol ürək-damar sisteminə artıq yük verir, üzərinə bir də soyuğun təsiri əlavə olunduqda nəticələr gözlənilməz ola bilər.

Soyuğa qarşı fərdi dözümsüzlüyü olan insanlar

Bu insanlar soyuğa qarşı yüksək həssaslıq göstərirlər, bu da soyuq allergiyası (soyuq urtikariya) və digər xoşagəlməz reaksiyalar şəklində özünü göstərə bilər.