Şampunların tərkibində bu 4 maddə varsa almayın: Həmişə yoxlayın!

Saç üçün istifadə etdiyimiz şampunlar və digər baxım məhsulları hər zaman faydalı olmaya bilər. Bəzi tərkiblərdə olan aqressiv kimyəvi maddələr saçların qurumasına, strukturunun pozulmasına və baş dərisinin zədələnməsinə səbəb ola bilər.

Lent.az xarici mediaya istinadən xəbər verir ki, mütəxəssislər saç baxımı məhsullarında qarşısını almaq lazım olan bəzi maddələrə diqqət çəkirlər.

Nədən çəkinmək lazımdır?

Kokamidopropilbetain - Bu maddə şampunlarda sulfatların əvəzi kimi istifadə olunur. Hətta məhsulun üzərində “sulfatsız” yazılsa belə, tərkibində bu maddə ola bilər. Kokos yağı və dimetilaminopropilamin əsasında hazırlanır. Həssas dərilərdə allergik reaksiyalar, qızartı və kontakt dermatitə səbəb ola bilər ki, bu da saç follikullarına ziyan vura bilər.

Natrium xlorid (duz) - Saç baxımı məhsullarında ucuz dolgu maddəsi kimi istifadə olunur. Lakin baş dərisinin qurumasına, dəridə susuzluğa və qıcıqlanmaya səbəb ola bilər. Dərini və saçları təbii yağlardan təmizləyərək qoruyucu baryeri zəiflədir.

Silikonlar - Silikonlar saçlarda qoruyucu təbəqə yaratmaq üçün istifadə olunur, lakin onlar baş dərisində istifadə edildikdə follikulları tıxaya bilər. Həmçinin, nazik və zəif saçları ağırlaşdıraraq yağlı və cansız göstərə bilər.

Daş kömür qatranı - Psoriaz üçün nəzərdə tutulan bəzi müalicəvi şampunlarda olur. Tərkibində kanserogen sayılan polisiklik aromatik karbohidrogenlər var. Uzunmüddətli istifadəsi sağlamlıq üçün təhlükəlidir.

Saç və baş dərisi üçün faydalı maddələr

Aloe vera - Yarasağaldıcı təsiri ilə tanınan bu maddə baş dərisini sakitləşdirir, dərini nəmləndirir və dermatit əlamətlərini aradan qaldırmağa kömək edir.

Çay ağacı yağı - Güclü antimikrob və iltihab əleyhinə təsirləri var. Kəpəyə qarşı vasitələrlə birlikdə istifadə edildikdə müalicə effektini artırır.

Nanə yağı - Təbii sərinləşdirici təsiri ilə baş dərisindəki qaşınmanı azaldır və təzəlik hissi yaradır.

Hamamelis (witch hazel) - Baş dərisindəki qıcıqlanmanı azaldır, saç köklərinin sağlamlığını qorumağa kömək edir.