Beyin şişlərinin erkən diaqnostikasında irəliləyiş: detallar AÇIQLANDI

Yeni sistem mikro şişlərin aşkar edilməsində 97,4 faiz, 12 millimetrdən böyük şişlər üçün isə 100 faiz effektivlik nümayiş etdirib.

Hollandiya Xərçəng İnstitutunun alimləri yeni kəşf - beyində şişləri aşkar etmək üçün süni intellektdən istifadə edən sistemi təqdim ediblər.

Lent.az xarici KİV-ə istinadla məlumat verir ki, araşdırmalar zamanı yeni texnologiya, xüsusilə maqnit rezonans görüntüləmə (MRT) zamanı tez-tez aşkar edilməyən kiçik şişlər üçün yüksək dəqiqlik göstərib.

Beyin metastazları mərkəzi sinir sistemi şişlərinin ən çox yayılmış növüdür və xərçəngli yetkinlərin 17 faizinə təsir edir.

Lakin ən böyük problem odur ki, mikroşişləri aşkar etmək son dərəcə çətindir, çünki onların diametri 3 mm-dən azdır və hətta bir neçə MRT müayinəsi ilə belə onları müəyyən etmək çətinləşir.

Yeni sistem mikroşişlərin aşkarlanmasında 97,4 faiz, 12 millimetrdən böyük şişlər üçün 100 faiz, 6-12 millimetrdən böyük olanlar üçün 98 faiz, 3-6 millimetrlik şişlər üçün 97,9 faiz, 3 millimetrdən kiçik şişlər üçün 93 faiz effektivlik nümayiş etdirib.

Hollandiya Xərçəng İnstitutunun neyroradioloqu və layihənin klinik rəhbəri Lorens Topff deyib: "Bu texnologiya irəliyə doğru atılmış mühüm addımdır. O... həkimlərə vaxtında və dəqiq müalicə qərarları verməyə kömək edəcək".

Alimlər əlavə edib ki, onların inkişafı şişlərin diaqnostikası prosesini sürətləndirmək və buraxılmış halların riskini azaltmaq üçün nəzərdə tutulub.