İkinci “Mona Liza” mübahisələrə səbəb oldu

İtaliyanın Turin şəhərindəki “Promotrice delle Belle Arti” qalereyasında təşkil olunan “Birinci Mona Liza” sərgisi çərçivəsində Leonardo da Vinçinin çəkdiyi “Mona Liza”nın daha əvvəlki versiyası kimi təqdim edilən “Mona Liza Aylvorta” əsəri nümayişə çıxarılıb.

Lent.az xəbər verir ki, əsərin müəllifinin məhz Leonardo da Vinçi olduğunu iddia edən İsveçrədəki “Mona Liza” Fondunun baş katibi Coel Feldman bu əsəri onun şəxsi sahiblərinin adından sərgiyə gələnlərə tanıdır.

“Biz heç bir şübhə yeri qalmadan, Leonardonun əslində iki “Mona Liza” əsəri yaratdığını və bu tablonun məhz həmin ikinci əsər olduğunu sübuta yetirdik”, – deyə C.Feldman Londonun “Time” nəşrinə açıqlamasında bildirib. – “Bu sərgi bizə əsərin müəllifliyinin həqiqətən Leonardo da Vinçiyə aid olduğunu sübuta yetirmək üçün son illər ərzində əldə etdiyimiz əhəmiyyətli nailiyyətləri nümayiş etdirmək imkanı yaradır”.

Lakin bu “nailiyyətlər” heç də hər kəsi qane etməyib. İtaliyanın mədəniyyət nazirinin müavini Vittorio Zqarbi əsərdə Leonardonun “ruhunun” duyulmadığını və kimlərinsə onun həqiqiliyinə inanmasını heç cür başa düşə bilmədiyini deyib.