Da Vinçinin "Sonuncu şam yeməyi" - Bilinməyən DETALLAR

“Sonuncu şam” freskasının yaradılma tarixi dəqiq məlum deyil, lakin incəsənət tarixçiləri Leonardo da Vinçinin bu əsəri 1494–1498-ci illər arasında çəkdiyini hesab edirlər.

Lent.az xarici mediaya istinadla əsər haqqında maraqlı faktları təqdim edir.

Bir tərəfdən, süjet izləyici üçün kifayət qədər anlaşıqlıdır: İsa Məsih axşam yeməyi zamanı həvariləri ilə birlikdə süfrə arxasında əyləşib. Lakin söhbət adi bir şəkildə davam etmir, çünki məhz bu an Allahın oğlu oradakılara bildirir ki, onun şagirdlərindən biri tezliklə həm inancını, həm də ona yaxın olan bir insanı – yəni Məsihi – xəyanətə uğradacaq.

Leonardo da Vinçinin yaradıcılığa yanaşması həqiqətən də heyranedicidir. Rəssam bəzən lazımi obrazı tapa bilmədiyi üçün əsərində bəzi hissələri uzun müddət boş saxlayırdı. Demək olar ki, hər bir obrazı Da Vinçi böyük çətinliklə ərsəyə gətirirdi. Məsələn, Yəhuda obrazı uzun müddət boş qalmışdı, ta ki, bir gün italyan sənətkar xəndəkdə sərxoş və cırıq paltar geyinmiş bir kişi görəndə bu obrazı canlandıra bilir.

Növbəti fakt isə bu günə qədər incəsənətsevərləri heyrətə gətirir: İsa və Yəhuda obrazları eyni adamın simasından ilhamlanaraq çəkilmişdir. Leonardo da Vinçi bununla göstərmək istəyirdi ki, işıqla qaranlıq arasında göründüyündən daha çox ortaq cəhət var.