Kann festivalında Azərbaycan pavilyonu təqdim ediləcək

Lent.az-ın məlumatına görə, bunu jurnalistlərə mədəniyyət və turizm naziri Əbülfəs Qarayev deyib. Nazir bildirib ki, mayın 11-dən 16-a qədər Fransanın Kann şəhərində keçiriləcək festivalda iştirak etmək oraya gedəcək: “Ötən ilki festivalda Azərbaycan sadəcə, reklam xarakterli lövhələrin vurulmasına nail ola bilmişdi. Bu il isə müxtəlif ölkələrin pavilyonlarının sırasında Azərbaycanın pavilyonu da qurulacaq. Mayın 14-də Kann festivalı çərçivəsində Azərbaycan pavilyonunun təqdimatı keçiriləcək. Orada son illər ölkədə çəkilən filmlərin, reklam materiallarının təqdim olunması nəzərdə tutulur”.

Ə.Qarayev festival çərçivəsində Fransanın tanınmış kino xadimləri ilə görüşlərin olacağını da qeyd edib: “Bu yaxınlarda Azərbaycanda səfərdə olan Jerar Depardye ilə də yeni filmlərin çəkilişi ilə bağlı danışıqlar aparılacaq və müqavilələr imzalanaq. Bu, bizim ilk təqdimatımızdır. Bu addımdan sonra artıq Azərbaycan filmlərinin Kann festivalının proqramına daxil edilməsi üçün lazımi işlər görülməlidir. Bizim siyasətimiz ondan ibarətdir ki, tədricən Azərbaycan kinosunu tanıdaq”.

Xəyalə Muradlı