XVIII Beynəlxalq Kitab Festivalında Azərbaycan guşəsi yaradılıb - FOTO

Səfirlikdən Lent.az-a verilən məlumata görə, aprelin 14-də Macarıstan paytaxtındakı Millenium İncəsənət mərkəzində Avropa Birliyinin egidası altında fəaliyyətə başlayan festivalı ölkənin təbii resurslar naziri Mikloş Reteli açıb. Festivalda 50-dən çox ölkənin nəşriyyatları iştirak edir. Səfirliyin daxili resursları hesabına təşkil edilmiş Azərbaycan guşəsində respublikamızın müxtəlif nəşriyyatlarında çap olunmuş 100-dən artıq kitab sərgilənir. Onların arasında son illər səfirlik tərəfindən macar dilində nəşr edilmiş 30-a yaxın kitab iştirakçıların diqqətini çəkib. “Macarca-azərbaycanca danışıq kitabçası”, “Gəlin azərbaycanca danışaq” kitabları, “Kitabi-Dədə Qorqud”, “Koroğlu”, “Oğuz xan” dastanları, habelə Dağlıq Qarabağ münaqişəsinə, Azərbaycan-Macarıstan tarixi əlaqələrinə, Azərbaycanın enerji strategiyasına və turistik imkanlarına, mədəniyyətə və milli mətbəximizə dair macarca nəşrlər festival iştirakçıları arasında xüsusi maraq doğurub. Səfirliyin nəşrlərinin bir qismi macar kitab həvəskarlarına hədiyyə edilib.

Avropa Birliyi ölkələrinin tanınmış yazıçı və şairlərinin qatıldığı XVIII Budapeşt Beynəlxalq Kitab festivalı aprelin 18-nə qədər davam edəcək.