“Əbədiyyət dastanı”nın audio versiyasının ilk təqdimatı oldu – FOTOLENT

Lent.az-ın məlumatına görə, layihəni “Mədəni İnkişaf Mərkəzi” İctimai Birliyi Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə həyata keçirib.

Mərasimdə “Mədəni İnkişaf Mərkəzi” İctimai Birliyinin rəhbəri Gəray Əlibəyov çıxış edərək layihənin həyata keçirilməsində əməyi olan hər bir kəsə təşəkkürünü bildirib. Audio disk barədə ətraflı məlumat verən G.Əlibəyovun sözlərinə görə, poemanın elektron versiyasında Qara Qarayevin, Arif Məlikovun və digər tanınmış bəstəkarların 28 musiqisi yer alıb. Poemanı isə Zəlimxan Yaqub özü ifa edib: “Əslində layihədə nəzərdə tutulmuşdu ki, poemanı aktyorlar səsləndirəcək. Ancaq çox düşündükdən sonra qərar gəldik ki, Zəlimxan müəllim özü ifa etsə, daha yaxşı olar. Həm də gələcək nəsillərə bir xatirə kimi qalar”.

Tədbirdə diskin rejissoru Rövşən Almuradlı, Sumqayıtın şair və müəllimləri də çıxış edib.
Yenicə əməliyyat olunmuş xalq şairi Zəlimxan Yaqub isə diskin hazırlanmasında zəhməti keçənlərə minnətdarlığını bildirib.

Onu da qeyd edək ki, nəfis tərtibatda hazırlanan audio diskin ikinci təqdimat mərasimi oktyabr ayının ortalarında Gəncədə keçiriləcək.

Xəyalə