Beynəlxalq Musiqi Festivalı başa çatdı

Lent.az-ın məlumatına görə, festivalın son konserti sentyabrın 28-də Beynəlxalq Muğam Mərkəzində olub. Konsertdə Sinqapurun “TANG” simli kvarteti çıxış edib.

Konsertin proqramında Bethovenin “Böyük fuqa”, Firəngiz Əlizadənin “Oazis” və “Muğamsayağı”, S. Barberin “Simli kvartet” əsərləri yer alıb.

“TANG” kvarteti Sinqapurun ilk klassik simli kvartetidir. 1992-ci ildə yaradılan kvartet 1999-cu ildən geniş konsert fəaliyyətinə başlayıb. İfaçıların soyadlarının əksi olan “TANG” adı Tanq sülaləsi mədəniyyətinin qızıl dövrünü simvolizə edir. Dünyanın bir çox ölkələrində uğurla çıxış edən kvartet bir sıra beynəlxalq müsabiqələrin laureatı olub.

Xatırladaq ki, Beynəlxalq Musiqi Festivalının təntənəli açılış mərasimi bəstəkarın doğum günündə - sentyabrın 18-də Heydər Əliyev adına Sarayında keçirilən təntənəli konsert proqramı baş tutub. 10 günlük festival çərçivəsində Azərbaycanla yanaşı, Rusiya, Türkiyə, Kanada, Sinqapur və digər ölkələrin görkəmli ifaçıları, musiqi kollektivləri çıxış ediblər.

Xəyalə Muradlı