İtaliya universitetində Azərbaycanşünaslıq kafedrası olacaq

İtaliyanın ən böyük ali təhsil müəssisəsi olan Sapienza Universiteti ilə imzalanmış müqavilə əsasında 2013-cü ilin yanvar ayından Şərqi Avropa tarixi fakültəsi nəzdində Azərbaycanşünaslıq kafedrası fəaliyyətə başlayacaq.

Xarici İşlər Nazirliyinin mətbuat xidmətindən Lent.az-a verilən məlumata görə, Sapienza Universiteti ilə əməkdaşlıq çərçivəsində ölkəmizə dair iki italyan dilli kitabın hazırlanaraq, çap edilməsinə dair razılıq əldə olunub.

Ölkəmizlə bağlı italyan dilində yazılan ilk kitab – “Azerbaigian: una lunga storia” artıq çap edilib. Kitab Sapienza Universitetinin prorektoru professor Antonello Biacininin rəhbərliyi altında universitetin müəllim heyəti tərəfindən hazırlanıb. Kitabda Azərbaycan tarixi ən qədim dövrlərdən başlayaraq müasir dövrə qədər əhatəli təsvir olunub, ölkəmizin mədəniyyəti və ədəbiyyatı barədə geniş məlumat verilib. Eyni zamanda Azərbaycan Demokratik Respublikasına dair İtaliya arxivlərində saxlanılan sənədlər əsasında Sapienza Universiteti tərəfindən cari ilin oktyabr ayının sonunda toplunun hazırlanması da nəzərdə tutulub.